News News

በኢትዮ ቴሌኮም የሥራ አመራር ቦርድነት እና በዋና ሥራ አስፈፃሚነት ሲያገለግሉ የነበሩትንና በአዲስ መልክ እንዲመሩ ለተመደቡት ሽኝትና አቀባበል ፕሮግራም ተደረገ::

በኢትዮ ቴሌኮም የሥራ አመራር ቦርድነት እና በዋና ሥራ አስፈፃሚነት ሲያገለግሉ የነበሩትንና በአዲስ መልክ ዘርፉን እንዲመሩ ለተመደቡት አመራሮች የሽኝትና የአቀባበል ፕሮግራም በመገናኛና ኢንፎርሜሽን ቴክኖሎጂ አዘጋጅነት ተደረገ፡፡

ክብርት ወ/ሮ ኡባህ መሐመድ የመገናኛና ኢንፎርሜሽን ቴክኖሎጂ ሚኒስቴር ሚኒስትር በፕሮግራሙ ላይ በመገኘት የምስጋናና የሥራ አቅጣጫ መልዕክት ያስተላለፉ ሲሆን የቀድሞ የተቋሙ አመራሮች ለዘርፉ ላበረከቱት ተጨማሪ አስተዋፅኦ አመስግነው አዲሶቹ አመራሮችም የተቋሙን አሠራሮች ይበልጥ በማሻሻል ለህብረተሰቡ የተሻለ አገልግሎት ማቅረብ እንደሚገባ አሳስበዋል፡፡

ክብርት ሚኒስትሯ አያይዘውም መንግስት ዘርፉ በባለሙያው እንዲመራና ሴቶችን ወደ ኃላፊነት ቦታ ለማምጣት የሠራውን ሥራ አድንቀዋል፡፡

የኢትዮ ቴሌኮም የቀድሞ ዋና ሥራ አስፈጻሚ ዶ/ር አንዱዓለም አድማሴ ያሳለፉት ጊዜ ቀላል የሚባል አለመሆኑንና የሥራ አመራር ቦርዱ፣ ማኔጅመንቱ እና ሠራተኛው በትጋት የሠራበት እና ጥሩ ውጤት የተመዘገበበት መሆኑን ገልፀው ቀጣዩ ደግሞ የተሻለ እንደሚሆን ያላቸውን እምነት ገልፀዋል፡፡

አዲስ የተመደቡት የኢትዮ ቴሌኮም ዋና ሥራ አስፈጻሚ ወ/ሪት ፍሬህይወት ታምሩ በበኩላቸው የቀድሞ የተቋሙ አመራሮች የነበራቸውን ዕውቀት እና አቅማቸው የፈቀደውን ሁሉ በማድረግ፣ በብዙ ጥረት አሁን ተቋሙ የደረሰበት ደረጃ እንዲደርስ ማድረጋቸውን ገልፀው፤ የቀድሞ አመራሮች የጀመሩትን የዕድገት ጎዳና ከአዲሱ የሥራ አመራር ቦርድ እንዲሁም ከኢትዮ ቴሌኮም የሥራ ኃላፊዎችና ሠራተኞች ጋር በመሆን እንደሚሠሩ ቃል ገብተዋል፡፡

ዋና ሥራ አስፈፃሚዋ አክለውም ሀገሪቱ የምትጠብቀውን በመረጃ የበለፀገ ህብረተሰብ ለመገንባት የሚያስፈልገውን ለማድረግ ከሚመለከታቸው አካላት ጋር በመሆን የበኩላቸውን አስተዋፅኦ እንደሚያበረክቱ ያላቸውን ተስፋ ገልፀዋል፡፡


News Archive News Archive

— 10 Items per Page
Showing 1 - 10 of 25 results.